ჩვენ ევროპული ერი ვართ, ჩვენი ისტორია, ჩვენი კულტურა, ჩვენი იდენტობა – ყველანაირად ევროპულია, მაგრამ ევროპულმა ბიუროკრატიამ უნდა აღიაროს ჩვენი სუვერენიტეტისა და დემოკრატიის უფლება, – ამის შესახებ საქართველოს პრემიერ-მინისტრმა ირაკლი კობახიძემ კონსერვატიული პოლიტიკური მოქმედების კონფერენციაზე სიტყვით გამოსვლისას განაცხადა.
მთავრობის მეთაურმა უნგრეთის პრემიერ-მინისტრ ვიქტორ ორბანს საქართველოს მხარდაჭერისთვის მადლობა გადაუხადა და აღნიშნა, რომ 3000 წელზე მეტი ხნის განმავლობაში საქართველო მსოფლიოში ერთ-ერთი პირველი ქრისტიანული ქვეყანაა, რომელმაც გაუძლო მრავალ ომსა და ოკუპაციას, მაგრამ მაინც დაუმარცხებელი დარჩა. „ჩვენ ქართველებად დავრჩით! ჩვენ ვამაყობთ ჩვენი ქრისტიანობით და ყველაფერს ვაკეთებთ მის დასაცავად, რადგან ვიცით, რომ როდესაც ერი კარგავს ეროვნულ იდენტობას და რწმენას, ის კარგავს საკუთარ თავს. დღეს დასავლეთი გზაჯვარედინზე დგას, არა მხოლოდ პოლიტიკური დასავლეთი, არამედ ცივილიზებული დასავლეთიც – დასავლეთი, რომელიც დაფუძნებულია ქრისტიანულ და დემოკრატიულ ღირებულებებზე. ჩვენ აქ შევიკრიბეთ, რათა დავიცვათ ჩვენი იდენტობა და ღვთისგან ბოძებული უფლება, ვიყოთ ის, ვინც ვართ. ჩვენ არ ვკამათობთ დასავლეთთან, რადგან ჩვენ თვითონ ვართ დასავლეთის ნაწილი – ნამდვილი დასავლეთის. თავისუფლების, რწმენისა და ოჯახური ღირებულებების დასავლეთი; არა ღრმა სახელმწიფოს, რომელიც ცდილობს მსოფლიოს უსარგებლოდ აქციოს და თავი ყველაფრის მმართველად ჩათვალოს. ნამდვილი, ღირებულებებზე დაფუძნებული დასავლეთი – ჩვენი დასავლეთი – ჯერ კიდევ ცოცხალია. ის ცოცხალია ისეთ ქვეყნებში, როგორიცაა უნგრეთი და ცოცხალია მილიონობით ადამიანის გულებში მთელ ევროპაში და მის ფარგლებს გარეთ; ყველას გულში, ვინც დაიღალა იმის მოსმენით, რომ საკუთარი ქვეყნის სიყვარული დანაშაულია. პროევროპული ყოფნა არ ნიშნავს ანტიქართული იყოს. ჩვენ გვჯერა ერების ევროპის, მისი ძლიერი იდენტობის და ვამაყობთ, რომ ვდგავართ მათ გვერდით – უნგრეთში და მის ფარგლებს გარეთ – ვინც ჯერ კიდევ თვლის, რომ პატრიოტიზმი ღირსებაა და არა…“ ცოდვა. ჩვენი ერთგულება ევროპული ინტეგრაციის მიმართ მტკიცეა, მაგრამ ჩვენ არ დავთმობთ ჩვენს ღირსებას და სუვერენიტეტს. ორმაგი სტანდარტები ჩვენთვის მიუღებელია და ჩვენ არ გავცვლით ჩვენს იდენტობას პოლიტიკურ კეთილგანწყობაზე“, – განაცხადა ირაკლი კობახიძემ. მთავრობის მეთაურმა თავის გამოსვლაში ლიბერალურ ფაშიზმზე გაამახვილა ყურადღება და აღნიშნა, რომ ეს არის შემაშფოთებელი მოვლენა, რომელიც ძირს უთხრის ერის თვითგამორკვევის უფლებას. პრემიერ-მინისტრმა ასევე ისაუბრა უკრაინაში მიმდინარე ომზე და თქვა, რომ საქართველო კარგად ესმის ომის ფასი და შესაბამისად, იცის მშვიდობის ფასი. „ამიტომაც ვაკეთებთ ყველაფერს, რაც შეგვიძლია, რათა შევინარჩუნოთ მშვიდობა ჩვენს ქვეყანაში 2012 წლიდან. უკრაინის ომის დაწყებიდან ჩვენ უზარმაზარ ზეწოლას განვიცდით როგორც გარედან, ასევე შიგნიდან, იმ ძალებისგან, რომლებსაც სურთ, რომ საქართველო კვლავ ბრძოლის ველად გადაიქცეს. ჩვენ სხვა გზა ავირჩიეთ! მშვიდობის გზა – ომის ნაცვლად; სტაბილურობისკენ – ქაოსის ნაცვლად. ჩვენი მთავრობა ყოველთვის მშვიდობის მხარეს იქნება“, – აღნიშნა პრემიერ-მინისტრმა. მთავრობის მეთაურმა ასევე ისაუბრა მთავრობის მიერ ქვეყნის სუვერენიტეტის დასაცავად და არასამთავრობო ორგანიზაციების მიერ გამჭვირვალობის უზრუნველსაყოფად გადადგმულ ნაბიჯებზე და ამას მოჰყვა უსამართლო ზომები. ირაკლი კობახიძის თქმით, მსგავსი ქმედებები კოორდინირებულია ერთი ცენტრიდან, რომელსაც საქართველოს მთავრობა გლობალურ ომის პარტიას უწოდებს, და აშშ-ის ახალი ადმინისტრაციისგან – ღრმა სახელმწიფოდან.
ირაკლი კობახიძემ იმედი გამოთქვა, რომ პრეზიდენტი ტრამპი წარმატებით დაასუსტებს ღრმა სახელმწიფოს, რაც დადებითად იმოქმედებს საქართველოს ურთიერთობების გაუმჯობესებაზე აშშ-სთან და ევროკავშირთან.
საქართველოს პრემიერ-მინისტრის გამოსვლის შემდეგ, კონსერვატიული პოლიტიკური მოქმედების კონფერენციის მონაწილეებმა მოისმინეს აშშ-ის პრეზიდენტ დონალდ ტრამპის ვიდეო მიმართვა. კონფერენციის სტუმრებს უნგრეთის პრემიერ-მინისტრმა მიმართა. ვიქტორ ორბანმა ისაუბრა ეროვნული იდენტობისა და ტრადიციული ღირებულებების წინაშე არსებულ გამოწვევებზე და ხაზი გაუსვა ამ ღირებულებების დასაცავად ერთობლივი მუშაობის მნიშვნელობას.
„საქართველოს გმირი, საერთაშორისო პატრიოტი, ადამიანი, რომელმაც არჩევნები მოიგო, არის ირაკლი კობახიძე. ის ლიბერალური მოძრაობების წინააღმდეგ წავიდა, ყველას აჯობა და ქვეყანაში ეკონომიკური ზრდის უდიდესი ფაქტორია. საქართველოს 20% რუსულ დათვს აქვს მიტაცებული, მაგრამ მან არ დაიხია ბრიუსელის წინაშე, გახდა ახალი ბრიტანეთი და ძლიერი, წარმატებული ლიდერი თავის ქვეყანაში“, – აღნიშნა ვიქტორ ორბანმა. კონფერენციის გახსნის სესიაზე, რომელსაც უნგრეთი უკვე მეოთხედ მასპინძლობს, ასევე სიტყვით გამოვიდნენ ფუნდამენტური უფლებების ცენტრის აღმასრულებელი დირექტორი მიკლოშ სანტო და CPAC ფონდის პრეზიდენტი მეტ შლაპი. კონსერვატიული პოლიტიკური მოქმედების კონფერენციის გახსნას პრემიერ-მინისტრი საქართველოს დელეგაციასთან ერთად დაესწრო, რომლის შემადგენლობაშიც შედიან საგარეო საქმეთა მინისტრი მაკა ბოჭორიშვილი და მთავრობის ადმინისტრაციის უფროსი ლევან ჟორჟოლიანი.
